Në kuadër të takimeve organizative për zgjedhjet parlamentare të 25 Prillit 2021, Kryetari i Grupit Parlamentar të Partisë Socialiste, Taulant Balla mori pjesë në mbledhjen e Asamblesë Socialiste të Elbasanit.
Balla nuk ka kursyer akuzat në drejtim të atyre që i konsideroi si kundërshtarë politikë, ndërsa i ka kërkuar strukturave socialiste që të përgatiten dhe mos vetëkënaqen.
Pavarvsisht optimizmit, që është krejt normal nga drejtues politikë, duket se situata në PS nuk është edhe aq e qetë sikundër përpiqen ta paraqesin.
Kryeministri Edi Rama duket se është në dilemë për ndryshimet në Qeveri, kur nga data e zgjedhjeve ka mbetur pothuajse edhe 7 muaj, ndërsa mbetet për t´u parë emrat e kandidatëve për deputetë nga Partia Socialiste.
“Dobësia e thellë e kundërshtarit dhe pabesueshmëria e tyre publike, nuk duhet të na vetëkënaqë duke lënë pas dore për asnjë moment organizmin/përmirësimin e strukturës së Partisë sonë.
Ne s’mund të jemi të vetëkënaqur se një pjesë e shqiptarëve na shohin si e keqja më e vogël, por shumica e shqiptarëve na beson ne si forca e vetme politike që ndërton shtet dhe garanton plotësimin e aspiratës për integrim europian.
Qasja jonë në qeverisje ka gjithmonë në themel shpirtin e protestës ndaj problemeve me të cilat përballen realisht shqiptarja e shqiptari i thjeshtë çdo ditë, në çdo zyrë shteti, në çdo bashki, në çdo shërbim publik etj”, tha Balla.
Ky i fundit do të vijojë të jetë drejtues politik i qarkut të Elbasanit, ndërsa pritet që zyrtarizimi të bëhet në mbledhjen e Asamblesë Kombëtare, e cila është shtyrë dy herë.
