Nga Boldnews.al
Nga propaganda vijnë, me propagandë mbahen dhe në propagandë do shkojnë. Kjo është moto e Rilindjes së Edi Ramës, e mbështetur nga çiraku i tij më i mirë Erion Veliaj. Nuk ka rëndësi produkti, puna e prekshme, investimet në të mirë të publikut, por vetëm bojatisja dhe mbulimi me gjethe fiku i “allateve” të qyteteve.
Sot Tirana është kthyer në një gërmadhë që në pamje të parë duket sikur zien nga puna. Në disa rrugë kanë nisur punimet, në të tjera gërryhet e zhgërryhet, ndërsa aty në bashki dosjet me tendera që fshehin miliona euro janë pirg dhe Lali Erit që tani ka nisur ti dhëmbë dora e djathtë, nga firmat e shumta që hedh çdo ditë por bosët e ndërtimit, oligarkët e përhershëm të pushtetit.
Ato copëza rrugësh, trotuaresh apo ndonjë qoshëze e mbetur parku mes pllatesh po bëhen gati për të kapur një afat, mars-prillin e vitit të ardhshëm. Është pikërisht koha kur do nisë egërsisht fushata e zgjedhjeve të përgjithshme parlamentare dhe tmerri është që Lali Eri jo një herë në ditë, por shumë më shumë do zaptojë ekranet televizive dhe portalet e blera dhe joshura me kohë prej tij.
Gjithçka e mirëmenduar për të mbuluar pasojat e pandemisë botërore dhe babëzisë së qeverisë sonë me asfalt rishtas, copëza trotuaresh dhe ndonjë shkurreje të mbjellë. Që tani ka nisur përgatitja, ku Lali Eri me dëshirën e tij, por edhe me urdhër të Ramës do të kthehet në “estetistën” e fushatës elektorale për Tiranën.
Puna e “estetistes Lali” është fare e thjesht për të, pasi ai vetëm atë di të bëjë më mirë, të shesë një produkt që nuk ekziston dhe mbi të gjitha të mbulojë me bojë e vijëzime në rrugë miliona euro që në fundin e saj kanë një cikël të mbyllur: oligarkë-pushtetarë… Lali do të shëbejë si një nikoqire që di të bëjë mirë pudrosje, lyrje dhe zhgryyeje në një fytyrë të rrudhosur, të grirë nga makutëria e vjedhjes dhe arroganca që të ofron pushteti i blërë dhe shitur që mbijeton vetëm në sajë të propagandës.
Sot Lali Eri është në delir ku edhe zyrtarisht Rama e ka caktuar si drejtuesin e fushatës elektorale për Tiranën, por në rast humbje (ku në fakt pritet të ndodhë), vetëm Lali Eri do jetë i pari që do të japë llogari para Ramës për dështimin që pritet të vijë nga kryeqyteti. Atëherë kjo “estetiste” do të shahet, shtyhet e pështyhet nga “gruaja e përdalë”, pushteti i sotëm.
Nuk është çudi që edhe dështimin mëse të mundshëm jo vetëm në Tiranë por në të gjithë shqipërinë tia veshin “estetistes” që vërtetë të podros, por më pas të nxjerr në rrugën e ndotur, në qytetin që të përpin frymën nga kullat, makineritë e tonazhit të rëndë që çlirojnë disksid karboni e bashkë me të edhe kancer. Për një “thes lekë” më shumë “estetistja” hedh firmë për prishje shkollash, për ndërtime pallatesh, për rrënimet e objekteve kulturore dhe historike vetëm e vetëm që të lulësojnë kullat dhe paraja e tajkspaguesve qytetarë të përfundojë në dyshën e pandashme pushtetarë-oligarkë!
