Olsi Rama ka prekur disa tema në konferencën për shtyp, por më shumë është ndalur te merkato, largimi i Bruno Telushit dhe objektivi.
Drejtori i Përgjithshëm i Partizanit, tregon se ku do të ndërhyjë klubi në merkato, sqaron ndarjen me mesfushorin vlonjat, i cili firmosi me Kukësin, dhe insiston se pse Partizani nuk duhet të ketë titullin objektiv primar për sezonin e ardhshëm.
Merkato – “Një qendërmbrojtës dhe një mesfushor cilësor janë detyrat kryesore të merkatos këtë vit, por edhe dy mbrojtës krahu, të cilët duhet të vijnë në ekip, të integrohen dhe të japin kontributin e tyre”.
Objektivi për sezonin 2020/2021 – “Titulli kampion është kurorëzimi i një sezoni ku ekipi duhet të tregojë paraqitje dinjitoze dhe lojë. Nëse ne e fillojmë sezonin duke kërkuar titullin, gabojmë pasi e shtrijmë këmbën më shumë sesa kemi hapin. Objektivi kemi rritjen e nivelit të ekipit dhe gjetjen e një fizionomie të Partizanit, me një lojë të menduar dhe studiuar që t’u përshtatet sa më mirë lojtarëve që do të marrim”.
