Kompeticioni më i rëndësishëm i kontinentit europian, Champions League, rikthehet mbrëmjen e sotme (ora 21:00) me dy përballje që garantojnë spektakël.
Në Angli pritet spektakël dhe “luftë” e fortë sportive për biletën në çerekfinale mes Manchester City dhe Real Madrid. Skuadra e Pep Guardiolës e ka fituar ndeshjen e parë 2-1 dhe skuadrën e ka të plotë edhe për mbrëmjen e sotme me përjashtim të Kun Agueros. Guardiola ka deklaruar se është tifoz i Barcelonës dhe do me çdo kusht ta mund Realin. City i ka fituar 5 ndeshjet e fundit dhe është në superformë.
Me misionin përmbysje zbret në fushë po në orën 21:00 edhe Juventusi. Bardhezinjtë duhet të kthejnë humbjen 1-0 në Francë ndaj Lyon. Dybala është ende në dyshim dhe në krah të Ronaldos mund të luajë Higuain.
Gjatë këtij sezoni, bardhezinjtë nuk kanë treguar për asnjë moment që janë të denjë për të triumfuar në një kompeticion si Liga e Kampioneve, ndërsa fatet e skuadrës të drejtuar nga Maurizzio Sarri, pritet të jenë në këmbët e Cristiano Ronaldos i cili përgjatë karrierës së tij të jashtëzakonshme ka treguar që është një rrezik i pakapërcyeshëm në ndeshjet ku varen fatet e një sezonit të tërë.
