Nga Boldnews.al
Skenari është çdo ditë i njëjtë! Një punonjëse e Ministrisë së Shëndetësisë jep të dhënat për pasojat e “Covid-19” në 24 orët e fundit. Fatkeqësisht edhe pse flitet për jetë njerëzish i ngjan “dhënies së motit” herë i mirë me era të lehta e herë me shtërngata…
Pasi konfirmon rastet e vdekjeve, shtrimeve dhe të infektuarve të rinj, konferenca e shtypit zgjat vetëm tre minuta, për tu takuar më pas në ditën tjetër… Këtë po bëjnë sot strukturat e shtetit. Asnjë masë mbrojtëse shtesë, asnjë strategji e aq më pak përgjegjësi për atë që po ndodh. Sot u shënua viktima e 182 me coronavirus që nga nisja e pandemisë në vend.
Janë 2589 raste aktive ku 280 pacientë figurojnë të shtruar, një pjesë e tyre në gjendje të rëndë, ku fatkeqësisht nuk përjashtohet mundësia që në ditët në vijim edhe të humbin jetën. Gjithashtu alarmi është se edhe dhjetë vende janë bosh në Spitalin Infektiv në QSUT dhe atë “Shefqet Ndroqi”. Për çështje shtretërish deri tani nuk është problem sipas qeverisë, pasi pritet të hapet “Covid 3” që do të jenë ambientet e Spitalit Kirurgjik në QSUT. Por kaq nuk mjafton, madje është shumë pak me atë që kërkohet.
Asnjë drejtues qeverie sot nuk flet për coronavirusin, me përjashtim të rasteve kur ndonjë koleg në Parlament apo qeveri preket nga Covid-19. Aty shpalosen “vlerat” e këtyre politikenjve ku mundohen të lenë mesazhe të ndjera për kolegët, në shtimin e dozave të aburdit për shërim të shpejtë, apo që sa më parë ta kalojnë këtë sëmundje pasi “punët e mëdha i presin”…
Pas shëllimit në diell dhe natëve të vona nën koktejle dhe qejfe do ikë edhe muaji gusht dhe qeveria ashtu me përtesë do të detyrohet të nisë punën. Po çfarë e pret? Viti i ri shkollor është në prag dhe sot qytetarët janë në ankth se ku do i dërgojnë fëmijët. Nga burime të Boldneës.al mësohet se Ministria e Arsimit nuk ka asnjë plan sesi do të nisë viti i ri shkollor dhe ai akademik në vend.
Ndërsa çdo ditë shifrat e qytetarëve të prekur nga Covid-19 rriten, qeveria nuk ka asnjë plan veprimi si do të vijohet në të ardhmen. Të vetmet lajme që sot qarkullojnë janë disa tendera luksi që vijojnë të bëjnë institucionet dhe bashkitë e vendit, por mungon strategjia për përballjen e situatës së rëndë që po kalon vendi.
Ekspertët e mjekësisë, ata që nuk e kanë ngatërruar ende përparësen e bardhë me atë mavi të Rilindjes shprehen të shqetësuar se rritja e numrit të të prekurve nga të rinj dhe për më tepër humbja e jetëve të tyre pa sëmundje bashkëshoqëruese është një fenomen mëse shqetësues, por vetëm strukturat drejtuese nuk po shqetëson.
Kërkohen ekzaminime më të shpejta dhe kryerja e tamponëve në kohë. Gjithashtu edhe protokollet mjekësore nevojitet të ndryshojnë pasi hospitalizimi në kohë mund të shpëtojë jetë të rinjsh. Pacientët përfundojnë në Spitalin Infektiv vetëm pasi përkeqësohet gjendja e tyre shëndetësore. Deri më tani po “aplikohet” ajo që ironikisht nuk duhet të ndodhte që quhet “mjekësia alo-alo”. Sa herë të sëmurët me coronavirus telefonojnë në numrin 127 për ndihmë prej disa punonjësve të Urgjencës Kombëtare u sufgjerohet vetëm: “pini paracetamol”. Kjo duket se është strategjia e qeverisë…!
