Lëvizja Socialiste për Integrim tashmë ndjehet e rrezikuar nga rritja e peshës së PDIU-së.
Ky fakt u vërtetua më së miri edhe në zgjedhjet e Dibrës, ku PS në aleancë të ngushtë me Idrizin arritën të fitonin bashkinë me një diferencë të madhe votash.
Ndërkohë që njohja që i bëri çështjes çame Johannes Hahn bëri që Idrizi të merrte direkt meritat duke bërë disa deklarata njëherësh, duke rritur akoma më shumë kredencialet e tij.
Dhe këtu hyn në lojë vizita e kreut të Kuvendit në Athinë pikërisht pas këtyre ngjarjeve.
Meta goditi në mënyrë indirekte Idrizin në një intervistë për agjencinë e lajmeve Athinë-Maqedoni (ANA), para vizitës së tij në Athinë, duke thënë se në Shqipëri nuk ka një parti politike serioze me një axhendë nacionaliste.
“Për fat të mirë, nuk ka një parti politike serioze në Shqipëri me një axhendë nacionaliste…Marrëdhëniet midis Greqisë dhe Shqipërisë janë marrëdhënie me rëndësi strategjike, me shkëmbimeve praktike si dhe me rëndësi jetike për të dy shtetet…Të gjitha partitë shqiptare respektojnë shtetin grek, integritetin territorial të tij dhe natyrisht qytetarët e saj si fqinjë dhe partnerë të zhvillimit social, ekonomik dhe evropian. Mendoj se do të ishte vendimi i duhur për të qëndruar larg spekulimeve, që qëllimisht përpiqen të krijojnë perceptimet e gabuara”, tha Meta.
Pra, pa përdorur fare diplomaci, kreu i LSI-së ka vënë në dukje se PDIU-ja nuk mund të merret si një parti serioze.
Ndërkohë që vizita e tij në Athinë në kulmin e debatit për çështjen çame është një tjetër lëvizjes e Metës për të nxjerrë në pah dobësinë që ka ministri ynë i Jashtëm, Ditmir Bushati, për të negociuar me Greqinë. Kreu i Kuvendit me vizitën e tij po zhvillon një diplomaci paralele nga diplomacia e ndjekur nga Bushati.
Marrëdhëniet e Metës me Bushatin janë prej kohësh të ngrira. Kryediplomati është akuzuar nga qarqe pranë LSI-së se në vizitat e tij në BE dhe Uashington ka lobuar kundër Ilir Metës, duke e nxjerrë këtë të fundit si politikan të korruptuar.