Komisioni i Pavarur i Kualifikimit shkarkoi të hënën nga detyra gjyqtarin e Gjykatës së Apelit Vlorë, Hysen Saliko.
Vendimi u shpall nga trupa gjykuese e përbërë nga Genta Tafa (Bungo), Etleda Çiftja dhe Suela Zhegu.
Avokati i subjektit kërkoi të bënte një kërkesë proceduriale për rihapjen e hetimit, kërkesë e cila u hodh poshtë nga trupi gjykues.
Trupa votoi me shumicë votash për shkarkimin nga detyra të Salikos, i cili nuk ishte prezent në sallë gjatë shpalljes së vendimit.
Hysen Saliko e ka filluar karrierën në sistemin gjyqësor në vitin 1994 dhe deri në 2006, ka ushtruar detyrën si kryetar i Gjykatës Kolonjë dhe në vitin 2006 është transferuar si inspektor në ish-Këshillin e Lartë të Drejtësisë.
Në vitin 2010, Saliko është emëruar gjyqtar në Gjykatën e Apelit Vlorë.
