Mjeku pneumolog Anibal Byberi, 53 vjeç, ka humbur jetën si pasojë e COVID-19. Mjeku ndodhej i shtruar në Spitalin COVID 2 “Shefqet Ndroqi.
Nga raportimet mësohet se mjeku ishte shtruar në spital në gjendje të rënduar shëndetësore, ndërsa nuk arriti të fitonte betejën me koronavirusin.
Byberi është shtruar me urgjencë te “Shefqet Ndroqi”, ku është vënë menjëherë në intubim, për shkak të gjendjes së rëndë shëndetësore, por fatkeqësisht ka ndërruar jetë në mbrëmjen e së dielës.
Mjeku Anibal Byberi vuante nga psoriasis, një sëmundje lëkure dhe obeziteti.
Mjeku pneumolog Anibal Byberi ka punuar mjek në Tropojë dhe ka mbajtur dhe postin e drejtorit në Spitalin e Tropojës.
Pas shumë vitesh punë në vendlindjen e tij, ka punuar për disa kohë si mjek në burgun 302, ndërsa aktualisht nuk ishte në punë, ndërsa këto ditë do të konkuronte në portalin “Mjekë për Shqipërinë”.
Nga shfaqja e pandemisë në vendin tonë, si pasojë e Covid-19 kanë humbur jetën 3 mjekë.
Mjeku i Hematologjisë, Arjan Pushi ndërroi jetë në spitalin infektiv në moshën 57-vjeçare dhe nuk vuante nga sëmundje të tjera bashkëshoqëruese.
Mjeku Hysni Shkjau, 69 vjeç, humbi betejën me koronavirusin po në spitalin Infektiv ku ishte i shtruar.
Dhe mbrëmjen e djeshme humbi jetën mjeku pneumolog Anibal Byberi.
