Vllaznia mbetet në Superiore, teksa ka fituar ndeshjen e play out-it kundër Besëlidhjes. Shkodranët triumfuan me rezultatin 3-1 dhe në fund kanë festuar një fitore që e kishin detyrim dhe që nuk i ngarkon me barrën e rënies nga kategoria për të dytën herë në vitet e fundit.
Vllaznia e nisi mjaft mirë ndeshjen kundër Besëlidhjes, duke shënuar dy gola brenda 19 minutave. Fillimisht në minutën e 15-të ishte Arsid Kruja është ai që ka arritur të realizojë golin e parë.
Mesfushori shkodran, me një goditje nga jashtë zone nuk fali dhe e dërgoi topin në rrjetë. Festë në fushën e blertë dhe në stol, pas një goli që i hap rrugë fitores së Vllaznisë dhe qëndrimit në Superiore. Goli i Krujës është pasuar nga një perlë e shënuar nga Herald Marku në minutën e 19-të, i cili nga më shumë se 30 metra ia doli të realizonte.
Fillimit të vrullshëm të skuadrës shkodrane, miqtë iu përgjigjën në minutën e 33-të, atu ku Xhorxheviç ngushtoi shifrat në 2-1.
Ndërkohë vendasit u përpoqën të shënonin golin e tretë që në pjesën e parë dhe rrezikuan në dy momente, por pa sukses. Sulmet e Vllaznisë nuk u ndalën edhe në fraksionin e dytë të lojës. Goli i sigurisë vonoi. Gilman Lika, kapiteni i shkodranëve, me një goditje në hyrje të zonës i dha qetësinë e duhur skuadrës së tij, që deri në fund e ruajti rezultatin dhe me shifrat 3-1 mundi Besëlidhjen dhe siguroi qëndrimin në Kategorinë Superiore.
