Kuvendi ka nisur seancën ku pritet të votohet për ndryshimet Kushtetuese. Për të miratuar ndryshimet duhen të paktën 94 vota, ndërsa opozita e bashkuar, ka deklaruar se nuk i mbështet, madje akuzon Edi Ramën se po shkel marrëveshjet e 14 janarit dhe 5 qershorit.
Duke folur nga foltorja e Kuvendit, deputetja Rudina Hajdari është shprehur se është e lumtur që sot votohet një ndryshim historik për vendin.
“Nga një çështje periferike, bashkë me kolegët tanë arritëm ta kthenim në një nga çështjet më të mbështetura nga publiku i gjëra dhe pa rezerva nga e gjitha klasa politike. Këtë fitore ia dedikoj qytetarëve shqiptarë”, tha Hajdari.
Por kolegët e saj në opozitën parlamentare, Kujtim Gjuzi dhe Artur Roshi janë shprehur kundër ndryshimeve Kushtetuese.
Gjuzi tha se janë fallsifikuar të paktën 4 firma të deputetëve që kanë firmosur kërkesën për ndryshimet Kushtetuese dhe paralajmëroi se do të braktiste seancën.
Ndërsa Artur Roshi tha se ndryshimet Kushtetuese, veçanërisht heqja e koalicioneve, favorizon Edi Ramën, që e cilësoi si Putinin shqiptar.
