Lufta me COVID-19 duket se nuk pyet për pozicione drejtuese, poste politike, apo edhe kategori biznesi.
1.Erion Veliaj. Sot është bërë i ditur lajmi se kryetari i Bashkisë së Tiranës Erion Veliaj, ka rezultuar pozitiv ndaj koronavirusit. Lajmin e ka bërë të ditur vetë kryebashkiaku në rrjetet e tij sociale, ku ndër të tjera shprehet se është në gjendje të mirë shëndetësore. Por kryebashkiaku i Tiranës nuk është i vetmi ndër politikanët që është prekur nga koronavirusi gjatë gjithë periudhës së pandemisë.
2.Bledi Çuçi Një tjetër politikan i cili është përballur me COVID-19 është ministri i Bujqësisë dhe Zhvillimit rural.
Më 24 korrik, në një prononcim ekskluziv për grupin mediatik “FJALA” Çuçi bëri me dije se prej disa ditësh ndodhej i infektuar me koronavirus ndërkohë që tani është në gjendje të mirë shëndetësore dhe është drejt shërimit.
3.Fatmir Toçi, ish-deputeti dhe botuesi i njohur i “Toena” rezulton i prekur me virusin Covid 19. Në një njoftim që ai ka shpërndarë mbrëmë afër mesnatës në faqen e tij në facebook Toçi njofton publikisht se është prekur nga virusi dhe i kërkon ndihmë institucioneve shtetërore.
Ndër të tjera Toçi njofton se pasi ka bërë tamponin ka rezultuar pozitiv, por për fat familjarët e tij nuk kanë rezultuar si ai bartës të virusit. Nga ana tjetër Toçi sugjeron të gjithë atyre që kanë patur kontakt ditët e fundit të bëjnë tamponin.
4.Adriatik Alimadhi, deputet në kuvend, u konfirmua pozitiv me koronavirus. Lajmi asokohe e bëri publik vetë ai në rrjetin social Facebook me një foto nga shtrati. Në statusin e tij ku njoftoi dhe se ishte pozitiv, Alimadhi akuzonte kryeministrin Rama për mungesën e infrastrukturës në spitale dhe për autoambulancën e rrënuar, e cila e kishte çuar për në Sanatorium ku edhe bëri analizat.
5.Ralf Gjoni, është deputeti që i shtohet listës së politikanëve me koronavirus. Lajmin e ka bërë të ditur vetë deputeti paraditen e sotme. Ai shton se do të qëndrojë i izoluar në shtëpi për dy javë. Gjoni ka qenë me temperaturë të lartë për tre ditë me radhë.
6.Enver Roshi, mjek dhe deputet njëkohësisht ka rezultuar pozitiv me koronavirus. Roshi ka bërë publike për një prononcim pë Fjala, se është në parametra normalë shëndetësorë, por e vetmja gjë që e ka lodhur janë telefonatat e gazetarëve.
7.Elio Hysko, kryetar i FRESH dhe njëkohësisht deputet në Kuvend, ka rezultuar pozitiv me koronavirus. Hysko ka deklaruar në një prononcim për Fjala se është në parametra normalë shëndetësorë dhe se për dy javë do qëndrojë i karantinuar në shtëpi./Fjala.al/
