Gazment Bardhi, Sekretar i Përgjithshëm i PD-së, përmes një postimi në rrjetet sociale, shkruan se ndryshimi i njëanshëm i Kushtetutës është provë që Edi Rama vazhdon koalicionin me krimin e organizuar.
Ndërsa ka publikuar një nga përgjimet e Bild llidhur me zgjedhjet e Dibrës, Bardhi shkruan se zgjedhjet në Shqipëri nuk i ka dëmtuar pjesëmarrja e partive politike në zgjedhje, por bashkëpunimi i Damianit me Ymer Lalat në blerjen e votave, bashkëpunimi i Vangjushit me Avdylajt në caktimin e kandidatëve dhe kërcënimin e votuesve, etj.
Reagimi i Bardhit erdhi pas një komenti në rrjetet sociale nga Damian Gjiknuri, përfaqësues i PS-së në Këshillin Politik, i cili tha se formula aktuale e koalicioneve favorizon partitë fantazma.
“Zgjedhjet i ka dëmtuar koalicioni i Edi Ramës me krimin e organizuar dhe jo koalicioni parazgjedhor i partive politike.
I braktisur nga qytetarët, Edi Rama po tenton të prish rregullat e garës në mënyrë të njëanshme, i friksuar nga humbja e zgjedhjeve dhe pushtetit të tij personal, që në 7 vjet e përdori vetëm për të mbështetur veten, oligarkët dhe krimin e organizuar!
Asnjë ndryshim i njëanshëm nuk mund të jetë i detyrueshëm për opozitën politike të vendit. Nëse Edi Rama ka vendosur të hedhë në erë zgjedhjet e ardhshme, ne do të bëjmë gjithçka që koston ta mbajë ai, personalisht, jo Shqipëria e shqiptarët”, shkruan Bardhi, duke publikuar videon e mëposhtme.
