Presidenti Ilir Meta vijon ta konsiderojë si anti-Kushtetues Parlamentin, duke u shprehur se legjitime janë vetëm 82 mandate.
Meta tha se kur Parlamenti miraton vendime që janë në përputhje me rekomandimet e Komisionit të Venecias atëherë ato janë legjitime.
Kreu i Shtetit tha se do të dekretojë ndryshimet në Kodin Zgjedhor, që u miratuan një ditë më parë me 99 vota, ndërkohë që sipas Presidentit ky Parlament ka legjitime vetëm 82 mandate.
Referuar takimit me kreun demokrat Lulzim Basha, Meta tha se ka nxitur pjesëmarrjen e opozitës në Këshillin Politik, duke mos rënë preh e provokimeve nga ana e mazhorancës.
Ndryshimet e njëanshme Kushtetuese do të penalizojnë vendin në rrugën e integrimit europian, paralajmëroi Meta, ndërsa shtoi se tani është koha për të reflektuar dhe për të mos cënuar 5 qershorin.
I pyetur për hapjen e listave 100 % ashtu sikundër u shpreh kreu demokrat Lulzim Basha, Presidenti Meta tha se e rëndësishme është që marrëveshja e 5 qershorit nuk duhet të preket.
“Edhe nëse mund të ndërhyhet në ndonjë element të marrëveshjes së 5 qershorit, kjo duhet të bëhet në mënyrë gjithëpërfshirëse, madje duke u konsultuar edhe me ekspertët ndërkombëtarë.
5 qershori është një marrëveshje e arritur me ndërmjetësimin ndërkombëtar dhe kjo është një marrëveshje e rëndësishme, e cila nuk duhet të cënohet”, tha Meta.
I pyetur lidhur me paralajmërimin se ndryshimet Kushtetuese mund të miratohen më 30 korrik, Meta tha se nuk ndalon askënd të çmendet, apo të hidhet edhe nga kati i 20.
“Mos harroni se jeta nuk ndalon në 30 korrik, ka edhe data të tjera. Por mos harroni se nuk ka më tryeza, as ka më marrëveshje dhe të drejta pakice, kur ke dhënë shembullin më të keq në këtë drejtim”, tha Meta.
