Gjykata e Krujës ka lënë në burg pa afat 23-vjeçarin Alket Brata nga Nikla, i cili akuzohet për shfrytëzimin për prostitucion të 17-vjeçares, nxitjen e përdorimit të lëndëve narkotike dhe vendosjen e eksplozivit në banesën e saj pas denoncimit.
Prokurori i cështjes Florjan Bonjaku kërkoi për të pandehurin arrest me burg që u la në fuqi nga gjyqtarja Enkeleda Hoxha. I riu nuk ka folur në seancë. Ndërkohë që avokati i tij Aldo Tabaku kërkoi një masë më të lehtë, lirimin e tij dhe vijimin e hetimeve në arrest shtëpie pasi sipas tij klienti i tij nuk ka lidhje me abuzimin, shfrytëzimin dhe nxitjen për përdorim e drogës të 17-vjeçares por “thjesht ka pasur një lidhje intime me vajzën para shumë kohësh”.
Kërkesa e avokatit Tabaku nuk është marrë parasysh nga gjyqtarja Enkeleda Hoxha e cila vendosi arrest me burg për të pandehurin. Pak ditë më parë, u arrestuan Edison Çangu 28 vjeç, Fatjon Leka 25 vjeç, Leonard Stafa 17 vjeç dhe Arbis Shima 26 vjeç, ndërsa Ameldi Merlika 17 vjeç u dorëzua në Sarandë. Aktualisht 5 nga të arrestuarit janë në burg, ndërsa Leonard Stafa 17 vjeç në arrest shtëpie.
