Teuta rikthehet në finalen e Kupës së Shqipërisë, pasi sonte mundu Kukësin dhe do të diskutojë trofeun kundër Tiranës.
Edi Martini, trajneri shkodran i durrsakëve, në emisionin “Gol pas Goli” në Supersport analizoi paraqitjen e skuadrës së tij dhe sigurisht u shfaq i lumtur për kualifikimin.
“Komplimentet janë për lojtarët, nuk di si ti falënderoj. Po mundohen çdo 3 ditë, një grup me 12-13 lojtarë. Përgëzimet më të mëdha për ta. Sot duhet të luanim mbrapa. Kukësi ka individualiteti, driblojnë dhe krijojnë hapësira. Ky ekip ka karakter, është si familje”, tha fillimisht Martini.
“Kapllani është lojtar me të ardhme. Futa shumë lojtarë në sulm, rrezikuam. Ai ka dëshirë, del para portës. Zoti ia shpërbleu dhe me anë të tij edhe ne. U thashë djemve që ekipi që ka karakter çohet në këmbë kur rrëzoher. Ishte karakteri i tyre që na solli këtë rezultat. Meritat janë të futbollistëve”.
“Oreksi vjen duke ngrënë. Duam të futemi në historinë e këtij klubi dhe të këtij qyteti. Do bëhemi gati ta fitojmë Kupën. Në Europë do shkojmë para se të vendoset Kupa. Shpresoj ta mbyllim Europën të dielën”.
