Prej disa javësh shifrat e raportuara zyrtarisht nga Ministria e Shëndetësisë mbi numrin e personave të prekur nga koronavirusi janë në nivele të larta, disa herë më shumë se ajo që përcaktohej si koha e pikut të pandemisë.
Nga rastet e raportuara së fundmi, vihet re se në të paktën dy qytete, Berat e Elbasan, mes të infektuarve janë personel shëndetësor, ndërsa në Gjirokastër bëhet fjalë për një pedagoge.
Nga 5 rastet e fundit në Elbasan 2 janë infermierë, një mjek pediatër në maternitet dhe vajza e një infermiereje të infektuar më herë në këtë qendër spitalore, e cila ka infektuar dhe vajzën e saj 4 vjeçare.
Ndërkaq në Berat janë konfirmuar sërish të infektuar nga radhët e personelit shëndetësor. Dy prej të prekurve janë laborante të njësisë vendore të kujdesit shëndetësor.
Gjithashtu rezultoi pozitive dhe një infermiere e qendrës shëndetësore të Urës Vajgurore.
Ndërsa e infektuara e katërt është një punonjëse fasonerie.
Në Gjirokastër ka rezultuar pozitive ndaj Covid-19 një pedagoge, e Ekonomikut.
