Sezoni 2019-2020 i La Ligës po i afrohet fundit teksa sot starton java e 35-të e kampionatit. Mbrëmjen e sotme duke filluar nga ora 22:00 luhet derbi i Katalunjës mes Barcelonës dhe Espanyolit.
Barcelona do të kërkojë në “Camp Nou” vetëm fitoren për të mbajtur gjallë shpresat për titull kampion. Messi-Suarez dhe Griezmann do të përpiqen të lidhen me njëri-tjetrin si në sfidën e fundit ndaj Villareal ku shkëlqyen për t’ia bërë më të thjeshta gjërat Barcelonës përballë skuadrës tjetër të Katalunjës që vetëm matematika e mban në Primera Division pasi sezonin e ardhshëm do të luajë në Segunda Division.
Çështja e titullit kampion tashmë nuk është në dorën e Barçës, teksa Real Madrid kryeson me katër pikë avantazh ndërsa kanë mbetur vetëm 4 ndeshje për të zhvilluar. Gjithsesi ashtu siç ka deklaruar edhe trajneri i skuadrës, Quique Setien, Barcelona do të luftojë deri në fund duke shpresuar nga një kolaps i “Los Blancos”.
Për sa i përket mungesave Barcelona duhet të bëjë sot pa, Frankie De Jong, Umtiti dhe Ousmane Dembele të gjithë të dëmtuar ndërsa nga ana tjetër rivalët do të kenë në dispozicion skuadrën e plotë.
