Situata e vështirë që po kalon Partizani në këtë sezon ka bërë që drejtuesit e klubit të mendojnë për ndryshime të rëndësishme në skuadër.
Një nga mënyrat kryesore për të ndryshuar situatën është ndërhyrja në merkato për përforcimin e skuadrës. Tashmë ashtu siç raporton gazeta sportive “Panorama Sport” në skenë për një afrim të mundshëm te Partizani ka dalë një emër që është kërkuar edhe në të shkuarën nga klubi i kuq.
Bëhet fjalë për mesfushorin me tipare sulmuese Agim Ibraimi i cili pak ditë më parë mbylli zyrtarisht aventurën me Shkëndijën e Tetovës dhe tashmë është një lojtar i lirë në merkaton e futbollistëve.
Paga e lartë e futbollistit vazhdon të mbetet një problem dhe është bërë pengesë për kalimin e Ibraimit në sesionet e shkuara të merkatos te të kuqtë, por këtë herë 31-vjeçari mund të ulë disi pretendimet e tij ekonomike dhe ky transferim mund të mbyllet me sukses.
