Tirana pret në orën 17:00 skuadrën e Vllaznisë në stadiumin “Selman Stërmasi”, ndeshje kjo e vlefshme për javën e 30-të të Kategorisë Superiore.
Kjo supersfidë ose siç njihet ndryshe edhe si klasikja e futbollit shqiptar është tepër e rëndësishme për të dyja skuadrat të cilat luftojnë për të arritur objektiva të ndryshme.
Tirana kërkon të hedhë një tjetër hap drejt titullit kampion dhe të harrojë humbjen ndaj Teutës ndërkohë që Vllaznia e trajnerit, Hysen Dedja, synon të mos dalë pa pikë nga kryeqyteti në mënyrë që të shpresojë deri në fund për të shmangur vendin e 8-të që e çon në play-out e për pasojë mund të bjerë nga kategoria.
Për sa i përket mungesave, Egbo, nuk do të ketë në dispozicion, Jurgen Çelhakan, ndërsa në dyshim është edhe talenti tjetër Albi Doka. Ndërkohë situata paraqitet më e mirë për ekipin shkodran që nuk do të kenë ndonjë mungesë të rëndësishme.
