Sapo janë mbyllur dy ndeshjet e orës 17:00 të vlefshme or javën e 29-të të Kategorisë Superiore.
Kukësi ka bërë detyrën ndaj Flamurtarit teksa kanë triumfuar në “Elbasan Arena” me rezultatin 4-1. Verilidorët praktikisht tre pikët i morën që në pjesën e parë ku shënuan tre herë me anë të Abazaj-t, Shkurtaj-t dhe Rrocës përkatësisht në minutat 4’, 27-të dhe 42-të.
Në pjesën e dytë sulmuesi, Ardit Hoxhaj, shkurtoi diferencat për vlonjatët përpara se Shkurtaj të shënonte dopietën e tij personale dhe golin e katërt për skuadrën në minutën e 61-të.
Nga ana tjetër takimi mes Vllaznisë dhe Bylisit ishte tërësisht i ekuilibruar. Miqtë në pjesën më të madhe të lojës e panë veten në avantazh por nuk arritën ta ruajnë atë në dy momente.
Bylisi kaloi në avantazh e para me penalltinë e Mëllugjës, ndërsa Gurishta barazoi në minutën e 23-të.
Mozzones iu anulua një gol në pjesën e parë, por në të dytën, sulmuesi i Bylisit arriti të shënojë sërish dhe të çojë shifrat në 1-2. Kur dukej se ballshiotët e kishin fituar takimin, Sidorenco katër minuta para fundit, vendosi rezultatin final në 2-2.
