Gjykata e Tiranës ka lënë të lirë aktivistët e Aleancës Kuq e Zi të ndaluar pak ditë më parë, pas mbylljes me zinxhirë të dyerve të bashkisë së Tiranës dhe Ministrisë së Jashtme. Në një bashkëbisedim në News24, ata kanë deklaruar se trajtimi i tyre nga ana e policisë ka qenë shumë i mirë, por kushtet e Policisë së Tiranës dhe Komisariatit numër 1 ishin skandaloze.
“Përveç kushteve skandaloze të higjienës janë sjellë jashtëzakonisht mirë. Mbështetje edhe për kauzën tonë. Çdo gjë e qeverisë fasadë. Policia e Tiranës është një ambient i bukur po ta shohësh nga jashtë, por brenda ndjen erën e nevojtores. Është çdo gjë veç fasadë. Përveç se ata njerëz na mbështetën nën zë, nuk kishte asgjë tjetër të dinjitetshme. Nuk kishte as sapun, as detergjentë, as letër higjienike. Të ndaluarit flinin përtokë .Ne pretendojmë të hyjmë në BE, si mund të hyjmë me këto kushte?”, kanë thënë kreu i Forumit Rinor të AK-së, Flavio Qarri dhe Kreu i AK Tiranë, Augent Xhaferraj. Ata kërkuan gjithashtu zgjedhje të parakohshme si e vetmja mënyrë për ta nxjerrë vendin nga kriza.
(Boldnews)
