Kryetari i sapo zgjedhur i Forumit Rinor të Partisë Demokratike, Besart Xhaferri, në një lidhje me Skype me “Radari Informativ” në Abc të gazetares, Juli Xhokaxhi, ka komentuar akuzat e hedhur ndaj tij për manipulim zgjedhjesh dhe ndërhyrje politike.
Xhaferri tha në Abc se në FRPD fitoi platforma e tij, ndërsa shtoi se kandidatët e tjerë vepruan gabim , pasi mund të kishin konkurruar në të njëjtën platformë nëse donin ta mundnin.
I pyetur nga moderatorja Xhokaxhi rreth akuzave se ai ka marrë mbështetjen politike të deputetit Belind Këlliçi, Xhaferri tha se këto deklarata më shumë e kanë dëmtuar.
Xhokaxhi: Edhe në këtë garë mes të rinjve pati akuza për manipulimin e votave. Nuk dua të ndalem shumë gjatë në akuzat për manipulim të zgjedhjeve të Forumit rinor, dua të flas për të ardhëm për aksionin politike. Besart u akuzat për manipulim të votave, ndërhyrje, mbështetje nga deputeti Belind Këliçi, çfarë ndodhi realisht?
Xhaferri: Këto janë akuza të porositura. Një akuzë ishte se është garë e paracaktuar. Më shumë se një garë e paracaktuar kam ndjerë një kontestim të paracaktuar. Patjetër që çdo garë ka kontestime, ka debat. Lajmi i mirë për shqiptarët është se vetëm për PD ka gara kur në fund kontestohet. Që të qartësojmë publikun është një garë ku unë kam fituar 55% të votave. Avantazhi im është se unë kisha përballë 5 kandidatë të cilët nëse do ishin në një front mund të më kishin rrezikuar. Por është dhe një përbaltje ndaj garës time, djersës time, por dhe ekipit tim në të gjithë Shqipërinë. Megjithatë unë u shtrij dorën konkurrentëve të mi për të ardhmen.
