Prej ditësh ka një shtim të numrit të rasteve me Covid-19, ndërsa Ministria e Shëndetësisë apelon për respektimin e masave mbrojtëse që kanë të bëjnë me higjenën personale dhe distancimin social. Në deklarimet zyrtare të Ministrisë së Shëndetësisë për shtimin e rasteve të reja fajësohen qytetarët, por duket se e vërteta është krejt tjetër.
Vatra, nga e cila po infektohen qytetarët është QSUT, megjithëse në informacionet zyrtare të Ministrisë së Shëndetësisë nuk jepen detaje mbi personat që në ditët e fundit rezultojnë të prekur nga Covid 19.
Por nëse i referohemi vetëm rasteve të sotme, nga ku rezultojnë 44 të prekur, një numër i konsiderueshëm ose janë infektuar pas trajtimeve në QSUT, ose janë të afërm të personave që trajtohen në qendrën spitalore.
Një ditë më parë u njoftua se nga Covid-19 ishin të prekur stafe mjekësore dhe pacientë, ndërkohë që edhe sot ka ndodhur e njëjta gjë.
Nga detajet e rasteve të sotme, mësohet se dy pacientët me Covid-19 në Lushnje janë infektuar në QSUT.
Gjithashtu pacienti i parë në Gjirokastër me koronavirus është infektuar në QSUT, ku trajtohej për hepatitin C.
Në Krujë, ku janë zbuluar 6 raste të reja, burimi i inefskionit sërisht është QSUT. Referuar të dhënave pacientët e fundit në Krujë janë kontakte të afërta të të infektuarve në Qendrën Spitalore Nënë Tereza.
Pra nëse mbledhim rastet e sotme, rezulton se 25 % e të prekurve e kanë marrë infeksionin pikërisht nga QSUT, në mënyrë direkte apo indirekte, si kontakte të afërta të personave që janë infektuar në Qendrën Spitalore.
