Kreu demokrat, Lulzim Basha, ka thirrur një mbledhje të Kryesisë së PD-së, në të cilën ka shpjeguar procesin e negociatave për marrëveshjen e arritur në Këshillin Politik për zgjedhoren.
Mësohet se gjatë mbledhjes, Basha ka kërkuar nisjen e procesit të përgjedhjes së kandidatëve të PD për deputet, ndërsa ka kërkuar përzgjedhjen sipas parimit “një anëtar, një votë”. Gjithashtu Basha ka kërkuar edhe përzgjedhjen e kandidatëve për zgjedhjet vendore, lënë të kuptohet se dy zgjedhjet mund të zhvillohen në të njëjtën ditë.
Referuar këtij propozimi, do të jetë anëtarësia e PD që do të përcaktojë kandidaturat.
Sipas udhëzimeve të kreut demokrat, procesi i përzgjedhjes së kandidatëve do të nisë më 20 qershor dhe do të përfundojë më 15 shtator.
“Kandidatët do i zgjedhë anëtarësia përmes parimit “një anëtar, një votë””, mësohet të jetë shprehur Basha.
Procesi do të realizohet sipas afateve të mëposhtme:
1. Brenda datës 15 qershor 2020, Sekretari i Përgjithshëm të propozojë për miratim në Kryesi, udhëzimin përkatës për realizimin e procesit të përzgjedhjes, konsultimit dhe seleksionimit të kandidatëve.
2. Procesi në nivel Dege për evidentimin/përzgjedhjen të realizohet në periudhën 20 qershor – 31 korrik 2020.
3. Brenda datës 1 gusht 2020 të ngrihet Komisioni i Vlerësimit të Kandidatëve pranë PDSH-së.
4. Procesi i seleksionimit të kandidaturave të realizohet në periudhën 1 gusht – 30 gusht 2020.
5. Procesi i konsultimit të kandidatëve të realizohet në periudhën 1 shtator – 15 shtator 2020.
