Alfred Peza, sekretar për marrëdhëniet me mediat në PS, përmes një shkrimi shprehet se deri më 8 qershor nuk do të ketë marrëveshje nga Këshilli Politik për reformën zgjedhoren.
“Çfarë pritet të ndodhi më 8 Qershor? Pasi Këshilli Europian miratoi më 24 mars hapjen e negociatave me Shqipërinë dhe Maqedoninë e Veriut, më 6 maj u zhvillua Samiti i Zagrebit BE- Ballkani Perendimor, ku u theksua mbështetja për integrimin e rajonit. Ndërkohë po punohet për detajet e fundit të dokumentave të rëndësishme, që do prezantohen më 8 Qershor në Bruksel, ku përcaktohet korniza në të cilën do të zhvillohen këto negociata të pranimit”, shkruan Peza.
Sipas tij, një nga kushtet për Shqipërinë, është edhe zbatimi i reformës zgjedhore. Ndaj, gjetja e konsensusit për arritjen e marrëveshjes mes palëve politike në tryezën e Këshillit Politik për këtë reformë përpara 8 Qershorit, do të ishte një lajm shumë i mirë për Shqipërinë që do ta gëzonte edhe BE.
“Pikërisht këtu qëndron edhe problemi. Kjo është edhe arësyeja se përse, atëherë kur u duk se opozita dhe mazhoranca ishin më pranë se kurrë për reformën zgjedhore, po shfaqen më larg se asnjëherë tjetër. Sepse opozita, marrëveshjen nuk e lexon si meritë të klasës politike dhe si arritje të Shqipërisë, por ka hallin e madh se ajo do të lexohet si një sukses i PS dhe Kryeministrit Edi Rama.
Pas kësaj, lexojeni edhe njëherë të plotë dhe me këtë sy postimin e Ilir Metës, për të kuptuar jo thjeshtë ironinë, por cinizmin e tij.
Cinizmin e Kreut të Shtetit që e di shumë mirë se jo vetëm Petrit Vasili i LSI, por edhe Oerd Bylykbashi i PD, çdo gjë mund të bëjnë por kurrë nuk kanë për ta dhënë dakordësinë në emër të opozitës, për aq kohë sa është vetë Ilir Meta, Monika Kryemadhi, Lulzim Basha dhe Sali Berisha ata që nuk ua lejojnë atë.
E mbani mend besoj vitin e kaluar kur Presidenti i Republikës, deklaronte se “në mendjen time është vetëm një datë, 18 tetori 2019”. Ishte dita e provimit për çeljen e negociatave të BE me Shqipërinë, e që u bllokuan në fund në mënyrë të njanshme nga Franca, etj. Por përtej asaj deklarate publike, të gjithë e kujtojmë se e vetmja datë me firmën e Ilir Metës, mbeti çdekretimi i zgjedhjeve lokale të 30 qershorit.
Ndaj, mos u lodhni kot. Marrëveshje për reformën zgjedhore, deri më 8 qershor 2020 në Shqipëri do të ketë, aq sa kishte zgjedhje më 13 tetor 2019!”, shkruan Peza.
Opinioni i Pezës, ish-deputet i PS dhe funksionar i Rilindjes, vjen në një kohë kur 3 ambasadorë Yuri Kim, Duncan Norman dhe Luigi Soreca, prej dy ditësh janë angazhuar në një proces të vështirë negociatash duke asistuar Këshillin Politik, mbledhjet e të cilit janë zhvendosur nga Pallati i Kongreseve te rezidenca e diplomates së SHBA.
