Tre punonjës policie janë aksidentuar mbrëmjen e sotme në Kamëz. Ngjarja raportohet se ka ndodhur pranë shkollës “Ibrahim Rugova”. Një makinë tip “Lexus”, që drejtohej nga 22-vjeçari Arnold Kola, goditi furgonin e policisë në të cilin ndodheshin pjesëtarët e forcave të rendit.
Nga aksidenti mbeti i vdekur polici Ervin Haxhiaj, 40 vjeç dhe u aksidentuan rëndë dy policët e tjerë, Besmir Voi dhe Neil Hoxha, të cilët u dërguan në spitalin Ushtarak, ku mbërriti menjëherë edhe ministri i Brendshëm Saimir Tahiri.
Automjeti që goditi patrullën e policisë po udhëtonte me shpejtësi të lartë dhe u përplas me furgonin e policisë, i cili si pasojë përplasi edhe një BMW që ndodhej e parkuar aty pranë. Nga përplasja mbeti i plagosur edhe drejtuesi i automjetit Arnold Kola që shkaktoi aksidentin. Ai u dërgua fillimisht në spital ku mori mjekimet e nevojshme dhe më pas u ndalua nga policia.
Në foto është makina e batuar që ka shkaktuar aksidentin me targa TR 8788 T.
