Nga Boldnews.al
Operatori i Shpërndarjes së Energjisë Elektrike (OSHEE) prezantoi sot me bujë pajisjen e re PDA, që sipas kompanisë do të lexojë dhe transmetojë në kohë reale në server të dhënat për çdo abonent.
Drejtori Rajonal për Tiranën Klevis Jahaj u shpreh sot se matja dhe faturimi i faturës së energjisë në kohë reale do të rrisë transparencën ndaj abonentit. Por ai nuk sqaroi se çfarë vlerë kanë këto matës (përveç parave të tenderit që janë blerë pajisjet), ku vetë zyrtarët e OSHEE fshijnë detyrimet në sistem për të përfituar rryfshet.
Edhe pse dyshimet janë se kjo është një tjetër afere korruptive, fakt mbetet se këta matës të kushtueshëm nuk kanë asnjë vlerë në një kohë që brenda rrjetit të OSHEE ka drejtues dhe punonjës që vjedhin përditë.
Jo më larg se disa ditë më parë, emisioni investigativ “STOP” zbuloi korrupsionin e radhës në OSHEE, ku disa punonjës të kësaj kompanie fshihnin detyrimet e prapambetura.
Përballë kamerës së fshehtë, një person debitor, me 1.2 milion lekë të vjetra, kërkon një mënyrë që të shmangë detyrimin që ka ndaj OSHEE-së. Për këtë atij “i vijnë në ndihmë” zyrtarët e Shërbimit të Klientit. Ata kërkojnë 350 mijë lekë të vjetra dhe i japin debitorit statusin e invalidit.
Pra, e gjithë skema do të realizohej nëpërmjet vërtetimeve të invaliditetit, ku OSHEE me anë të një vendimi të mëparshëm fal çdo detyrim të prapambetur ndaj kësaj shtrese të shoqërisë.
Sekseri i kësaj afere korruptive, punonjësi i një firme private sigurimi, Emirjon Lluka, i cili falë njohjeve që kishte me dy specialistë të Kujdesit ndaj Klientit në OSHEE, siguronte fshirjen e debive, madje edhe të shumave të larta.
Por ajo që e bënte akoma më të rëndë situatën, ishte se gjatë bisedës, Lluka tregonte se drejtuesi i OSHEE i ka udhëzuar vartësit e tij që të “punojnë” në maksimum për të mbushur xhepat e tyre.
Ai tregoi më tej se vetëm ai kishte bërë mbi 15 falje detyrimesh të prapambetura falë njohjes që kishte edhe me drejtues të lartë të OSHEE.
E ndërsa punonjësi i firmës private u arrestua, policia u treguar me dy standarde, duke i lënë në procedim të lirë dy zyrtarët e OSHEE-së të përfshirë në këtë skemë korrupsioni.
Pas këtij skandali, kuptohet se matësit e rinj janë thjesht një reklamë që OSHEE i bën vetes, ndërsa korrupsioni brenda radhëve të saj nxjerr “jashtë loje” dhe këta matës. Përveç kësaj, këta matës “inteligjent” në asnjë moment nuk do të frenojë abuzimet që bëhen me tenderat disa miliona euro.
