Lionel Messi ka kaluar plot 18 vite te skuadra e Barcelonës duke fituar gjithçka në nivel kolektiv dhe individual.
Dashuria që argjentinasi ka për Barcelonën si klub dhe qytet është e padiskutueshme ku të dyja palët kanë ndihmuar njëri-tjetrin gjatë gjithë këtyre viteve.
Megjithatë siç ka treguar Messi ka qenë një moment ku ai ishte shumë pranë largimit nga Barcelona. Bëhet fjalë për vitin 2016, kur Messi u dënua për evazion fiskal të kryer në periudhën 2007-2009. Kjo periudhë ishte e vështirë për 32-vjeçari dhe për Rac 1 ai është rrëfyer:
“Në atë kohë, falë kaosit që ishte krijuar prej çështjes së taksave, dëshiroja të largohesha. Doja të ikja nga Barcelona, më saktë doja të largohesha nga Spanja. Ndihesha sikur isha trajtuar shumë keq, nuk doja të qëndroja më te Barcelona. Askush nuk më bëri ofertë, pasi kujtonin se nuk do të lëvizja.”
“Nuk e fsheh dot, ishte një situatë e vështirë për mua dhe familjen time. Më ngushëllonte fakti që fëmijët e mi ishin të vegjël dhe nuk e kuptonin se çfarë po ndodhte. Në fund vendosa të qëndroj, para së gjithash për veten dhe familjen time.”
“Nuk doja të ndryshoja qytet dhe të humbisja lidhjet që kisha krijuar me njerëzit dhe miqtë e mi. Do të më kishte ardhur keq t’i kisha humbur të gjithë këto po të largohesha“, deklaron Leo Messi.
