Nga Boldnews.al
Nëse do të kishte një njësi matëse të që të vinte në peshë karakterin e njeriut, pesha do të prishej kur aty të ngjitej Ministri i Brendshëm Sandër Lleshaj. I shitur shtirshëm si “njeri me reputacion”, apo një “ushtarak i ditur”, Lleshaj po zhgënjen ata që morën penën për ti ngritur laved një personazhi që sot konsiderohet mëse politik dhe mbi të gjitha “krahu i dhunshëm” i mbrojtjes së pushtetit të Ramës, me çdo kusht dhe më e keqja me çdo mjet.
Janë disa raste, më i fundit ajo në përplasjen mes policisë dhe protestuesve për Tetarin Kombëtar.
Artistë, qytetarë të shumtë, intelektualë apo studentë ishin pjesa më e madhe e protestuesve përballë një “brigade” të madhe punonjësish policie, një pjesë e mirë me kapuçë në kokë dhe më të dhunshmit.
Terror, arrestime si të ishin kriminelët më të mëdhenj të vendit, apo terroristë me nam të keq në botë. Në fakt ishin vetëm artistë dhe qytetarë të mirë të vendit, që në jetën e tyre kurrë nuk e kishin parë derën e një qelie të komisariateve tona. Por edhe më i rëndë është qëndrimi i Ministrit të Brendshëm Sandër Lleshaj, këtij gjenerali që ka futur “spaletat” në kasafortën e Ramës dhe është bërë Rilindasi më i thekur, për të mbajtur në këmbë një pushtet që ka kapërcyer në pjesën tjetër të “gardhit”, që njihet si “trualli i diktaturës”.
-“Çfarë duhet të bënte policia më 17 maj 2020? Unë pyes çfarë duhet të bënte policia gjatë protestave të 2019? Gjatë tërmetit 2019? Gjatë pandemisë 2020? Përgjigjja nga shumë veta, protagonistë, ishte “Hiqni kapelën”, se unë dua të realizoj një qëllim me dhunë, pasi nuk kam arritur me instrumenta, i themi policisë hiq kapelën. Kjo është të rikthehemi shumë kohë më pas. Nuk e di nëse ata që e artikulojnë pa turp, thirrjen “hiqni kapelën”, a e mendojnë edhe një ditë Shqipërinë pa të. Nëse dikush e bën këtë pyetje sesi duket, i kujtoj datën 12 mars 1997, ata që janë në moshë për t’a kujtuar. Ata që se kuptojnë, le të lexojnë. I hoqën kapelet në ’97 dhe ndodhi ajo që ndodhi”-tha Lleshaj në Parlament.
Po e vërtetë, këtij ministri duhet tia kujtojmë mirë 12 marsin 1997. Ishte koha kur ushtria braktisi detyrën dhe nxiti qytetarët që ti përvisheshin depove të armatimit. Ky Lleshi ynë i sotëm, në atë kohë ishte ushtarak, madje në “mesin e karrierës”. Lleshaj e “hoqi kapelen” në trazirat e vitit 1997, duke mos pasur asnjë vlerë, asnjë moral dhe asnjë justifikim për atë që po bën sot.
Ky ushtarak, që aktualisht na del si mbrojtësi më i zjarrtë i një pushteti dhe jo shteti (duke shkelur liritë dhe të drejtat e individit), u lind në Mërkurth të Mirditës më 25 janar 1963. Qëndroi në vendlindje deri në moshën 14 vjeçare dhe më pas erdhi në Tiranë në Shkollën Ushtarake, duke u “mbrumosur” ndër vite, për të shpërthyer në ditët e sotme, së pari si Ministër i Brendshëm fort politik dhe mbi të gjitha si “gjenerali i Rilindjes” së kryeministrit Edi Rama!
