Presidenti Ilir Meta i është drejtuar me një apel shqiptarëve, por edhe politikanëve.
“Koha për një reflektim të thellë, që të mos humbasim rrugën europiane!”, shkruan Meta në rrjetet sociale.
Reagimi i Presidentit erdhi pasi e përditshmja pariziene “Liberation” i ka kushtuar një reportazh të gjatë zhvillimeve në Shqipëri, i cili nis me dënimin e këtij akti, që në shkrim cilësohet si “i pafalshëm”.
“Premtimet për të luftuar korrupsionin dhe pabarazinë nuk u mbajtën, dhe qindra mijë shqiptarë janë larguar nga vendi vitet e fundit. Reforma e pafund e sistemit të drejtësisë, e kërkuar nga Bashkimi Evropian, nuk frymëzon besim tek qytetarët për luftën kundër korrupsionit dhe krimit të organizuar. Zgjedhjet e fundit lokale panë që Partia Socialiste garonte vetëm, pa kundërshtarë dhe opozitë.
Më keq, ky vend, pro-evropian, aspirues i afërt i anëtarësimit në BE, është akuzuar se u shërben interesave të “oligarkëve” të industrisë së ndërtimit dhe për zhytjen në autoritarizëm.
Ndërsa Shqipëria nuk regjistron as 1.000 raste të Covid-19, Kryeministri ka aplikuar ligje pothuajse drakoniane, vetëm me lejen e policisë mund të bëhet pazar dhe vendosej shtetrrethim pas orë 13. Në fundjavën e shkatërrimit të teatrit, trafiku i makinave ishte i ndaluar në Tiranë”, thuhet në artikullin e gazetës franceze.
