Presidenti i Komitetit Olimpik Shqiptar, Viron Bezhani, në një intervistë të fundit ka prekusituatën e vështirë në të cilën ndodhet sporti në vendin tonë.
Duke folur për FanZone, Bezhani, ndër të tjera foli për negociatat me qeverinë, në lidhje për të rifilluar aktivitetet me të gjithë sportet, jo vetëm futbollin.
Futbolli filloi, por ka edhe sporte të tjera në Shqipëri…
Më vjen mirë që qeveria vendosi t’i “ndezë dritën jeshile” futbollit, por nuk duhet të harrojmë që ka shumë sporte të tjera dhe të gjithë duan t’i rikthehen normalitetit të tyre. Ne vijojmë të negociojmë me institucionet shtetërore, për të rifilluar të paktën me sportet individuale momentalisht dhe për të vijuar me sportet në natyre, që mbahen të bllokuar jashtë çdo logjike. Unë jam pro lejimit të futbollit, por nuk mund të lëmë në harresë sporte të tjera, pasi kemi sportistë që duan të përfaqësojnë Shqipërinë në Lojërat Olimpike dhe duhet t’u krijojmë kushtet që të punojnë e stërviten.
Pse ka kaq shumë probleme sporti në Shqipëri?
Unë e kam vënë re në shumë takime që kam zhvilluar, duke filluar nga vitet ’90, se njerëzit e politikës nuk ia dinë rëndësinë sportit dhe edukimit që ai sjell në shoqëri. Në parlamentin shqiptar, ndonëse kemi edhe sportistë, ju jeni dëshmitarë që nuk diskutohet asnjëherë për sportin. Duhet të marrim shembull nga Kosova, që ka një ligj shumë të mirë për sportin dhe po i jep një vëmendje maksimale, ndaj keni për të parë që shumë shpejt do të ngrenë sporte të shumta në nivele të larta. Ne duhet t’u krijojmë kushtet të rinjve që të vazhdojnë sportin dhe të kenë mundësi të ushtrojnë atë, pasi kjo është e vetmja mënyrë për të mbajtur të rinjtë këtu. Pra, konkluzioni është që këtu për sportin nuk është vlerësimi që duhet dhe kjo duket qartë nga infrastruktura sportive që ka vendi.
