Kuvendi ka miratuar rezolutën e paraqitur nga grupi parlamentar i PS-së dhe shpall Iranin shtet terrorist.
Me 79 votat e mazhorancës socialiste, u kalua rezoluta e propozuar.
Pati vetëm një abstenim nga deputeti i Lëvizjes Bashkë, Redi Muçi, ndërsa prezent nga opozita ka qenë edhe deputeti Erald Kapri.
58 deputetë të opozitës, kryesisht PD, nuk ishin prezent në këtë seancë, pasi e quajtën axhendë personale të Edi Ramës dhe fasadë.
Duke prezantuar projekt-rezolutën, Balla tha se Shqipëria disa herë ka qenë objekt i sulmeve kibernetike. Ai përmendi sulmin në 2022 ndaj institucioneve, por edhe atë më të fundit kundër Kuvendit.
“Vendi ynë ka qenë objekt i sulmeve në hapësirën kibernetike. Sulmi i rëndë ndaj institucioneve të Republikës së Shqipërisë në 2022, ishte një nga episodet më serioze të agresionit kibernetik të një vendi sovran. Pak ditë më parë, Kuvendi ishte shënjestra e një sulmi të ri kibernetik.
Këto janë akte armiqësore, që synojnë destabilizimin e institucioneve demokratike dhe funksionim normal të një shtetit. Rezoluta synon të adresojë këtë realitete.” – tha Balla.
