Nga Boldnews.al
Nëse Shqipëria moderne mund të kërkoj një fytyrë, ndoshta më të pafytyrë në politikën shqiptare, e ka shëmbëllimin më tipik-Erion Veliaj, kryetari i Bashkisë së Tiranës.
Pasi përfshiu të gjithë strukturat bashkiake për të dhunuar artistët dhe përdhunuar godinën e Teatrit Kombëtar, ai u shfaq në një vide-log, ku kërkonte “bashkëpunim dhe mirëkuptim” me të gjithë ata që janë kundër projektit të Teatrit të ri, siç e konsideroi ai.
Me një pamje të përvuajtur, në rolin e një aktori të dobët, Veliaj deklaroi mesditën e së Dielës nga zyra e tij se “u shtrin dorën” të gjithë artistëve dhe shoqërisë civile, “për të ndërtuar së bashku një godinë të re dhe moderne të Teatrit Kombëtar.
Këtë mesazh, siç tha ai, ua dërgonte artistëve dhe çdo qytetari shqiptar, pikërisht atyre që pësuan në kokën dhe trupin e tyre dhunën policore të Sandër Lleshajt dhe policëve të tij bashkiakë.
Ky teatër i shëmtuar, i sugjeruar së fundmi nga kryebashkiaku i Tiranës, dëshmon se ai dhe lideri i tij shpirtëror, kryeministri Edi Rama, ndihen në siklet.
Të paktën, në këto orë, ata duhet të menaxhojnë si duhet revoltën qytetare, me shpresën se zemërimi do të shuhet shumë shpejt.
Qytetarët e Tiranës, shumë shpejt, do të shohin se si, aty ku deri mëngjesin e së Dielës gjendej godina simbol e Teatrit Kombëtar, do të ngrihet një kompleks gjigand kullash, me miliona euro, për të cilat nuk dihet se nga cili burim do të vijnë.
Artistët, pas rrëzimit të godinës, me shumë mundësi do të nisin të zbehin protestën e tyre, pasi nuk kanë më një objekt. Tashmë lëvizja do të shndërrohet në thjesht “politike”.
Dhe, në atë terren, Edi Rama dhe Erion Veliaj, kanë treguar se janë më të zotë, janë më propagandues dhe kanë gjithnjë një plan.
Duke u vendosur fytyrës një maskë, jo nga ato për Covid, por nga ato të pafytyrësisë, ata do të mbysin çdo zë kundër tyre.
Kanë në duar pushtetin, paratë, e nëpërmjet tyre kanë perfeksionuar artin e “kulaçit dhe kërbaçit”.
RIP Teatri. Tashmë është koha e pafytyrësisë!
