Aleksandër Biberaj, anëtar i Këshillit Kombëtar i PD-së, tha se detyra e opozitës nuk është të mbështesë protestat që organizohen nga grupe të caktuara të shoqërisë.
Biberaj tha se opozita duhet të organizojë protestat, të marrë përgjegjësitë që i takojnë dhe të udhëheqë ato.
“S´mund të thotë opozita do të mbështesim protestat, por duhet të organizojë. Kjo është rruga e vetme, duhet aksion, pasi s´ka rrugë tjetër, ose një popull në burg dhe gjysma jashtë, ose duhet të protestojmë”, tha Biberaj në studion e Abcnews.
Në vijim ai tha se ajo që ndodhi me Teatrin tregon se kemi të bëjmë me një bandë kriminale, pasi nuk mund të shkosh atje ku janë një grup artistësh dhe qytetarësh me forca policore me kapuç dhe armë dhe të ndërhysh forcërisht, ti dhunosh.
Biberaj tha se nuk pret ndonjë reagim nga ndërkombëtarët, pasi tashmë jemi mësuar që reagimet e tyre janë të lehta.
“Siç duket ndjehen komodë me rrogat e tyre të larta. Atëherë duhet të ketë një reagim popullor, për të cilin opozita duhet të marrë përgjegjësitë. Mendoj se nuk mundet që një opozitë në një situatë të tillë, kur gjithçka ka rënë, të thotë se do mbështes protestat e artistëve, apo të grupeve të tjera”, tha Biberaj. Sipas tij, tërheqja e opozitës nga aksionet opozitare na ka kushtuar të gjithëve.
