Trajneri i skuadrës së Vllaznisë, Mirsad Jonuz, e ka cilësuar si të pamjaftueshme kohën nga momenti i rinisjes së stërvitjes në 18 maj, deri në 3 qershor kur do rifillojë kampionati.
Aktualisht në Maqedoninë e Veriut, ai ka zhvilluar një intervistë për Fanzone nëpërmjet një lidhjeje live. 58-vjeçari nënvizoi gjithashtu se Vllaznia i ka të gjitha mundësitë për të fituar Kupën e Shqipërisë në këtë edicion.
“Është e vështirë që pas dy muajsh pezullim të rikthehesh në stërvitje. Nuk e di si janë rregullat në Shqipëri. Nëse më 18 maj rinisim stërvitjen, 16 ditë do ishin të pamjaftueshme për të rifilluar kampionatin më 3 qershor. Si fillim është e rëndësishme që të kthehen të gjithë lojtarët, pasi disa janë jashtë. Ka disa pikëpyetje për kampionatin. Vllaznia është një pozitë shumë të favorshme, tashmë është koha që të bashkëpunojmë me bashkinë në mënyrë që gjithçka të shkojë shumë mirë”.
“Është shumë e rëndësishme të nisim njëherë stërvitjet. Nëse do fillonim më 10 qershor do ishte më mirë, duke ditur që nuk kemi edhe tifozët. Unë besoj se këtë vit mund të fitojmë Kupën dhe vitin tjetër me ndryshimet që do bëjmë do synojmë Europën.”, u shpreh Jonuz për “Supersport”.
