Kryebashkiaku i Tiranës, Erion Veliaj, thotë se për ndërtimin e Teatrit të ri Kombëtar do të merret kredi. Veliaj tha se për ndërtimin nuk do të përdoren paratë e buxhetit të shtetit dhe në arkë nuk i kemi paratë.
Nuk dihet pse Veliaj dhe Rilindja insistojnë pvr një godinë të re, kur sipas Aleancës në Mbrojtje të Teatrit, ka deklaruar se Europa Nostra është e gatshme të paguajë deri në 80 % të vlerës së investimit të rikosntruksionit të godinës aktuale.
Por me një kokëfortësi duket se Veliaj, i cili tashmë ka marrë flamurin për të vijuar projektin e një Teatri të ri, është i gatshëm të marrë edhe kredi, që do të paguhet me paratë e shqiptarëve për një godinë të re.
“Këtu nuk ka asnjë sekret. Ramë dakord që do të marrim një kredi dhe qyteti do të ketë një teatër të ri, siç ka stadiumin e ri, bulevardin e ri, që janë bizhutë e qytetit.
Për sa kohë Bashkia e Tiranës do të financojë teatrin e ri, fillimisht duhet ti kalojë prona që të bëjë investimin.
Hip se të vrava, zbrit se të vrara. Keq kur e bën publiku, keq kur e bën privati. Nevoja për një teatër kombëtar është e pashmangshme. Në momentin që nuk ke paratë në buxhet, i merr kredi. Nuk ka asgjë të jashtëzakonshme. Plani a ishte ta bëjmë me paratë e tjetrit, ra. Plani b, do e bëjmë me kredi”, deklaroi Veliaj në një intervistë për Syri TV.
