Kreu demokrat, Lulzim Basha, tha se opozita ka bërë veprimin e duhur në këto 6 javë të pandemisë, duke u fokusuar në çështjet e jetës, shëndetit dhe mbështetjes së qytetarëve.
“Përpara pandemisë ishim në kushtet e një autoritarizmi, ndërsa pandemia forcoi këtë dhe regjimin që qeveris përmes rrjeteve sociale.
Ne vumë nën presion Qeverinë përmes propozimeve tona, pavarësisht se nuk u zbatuan dhe nuk u morën parasysh.
Midis dy javëve Edi Rama ka qëndruar disa herë qëndrimet, një herë tallej me opozitën në Kuvend dhe pastaj zëvendësonte Kushtetutën me rrjetet sociale.
Ne jemi pa Gjykatë Kushtetuese, pa Parlament, pa Qeveri, ne ishim në autoritarizëm që para pandemisë.
Ka ikur koha që opozitat bërtisnin, që ulërasin. S´ka opozitë që ulëret, ka opozitë që denoncon, që propozon dhe që proteston, dhe ne u kemi dhënë shqiptarëve prova të qarta se udhëhiqemi nga interesi i qytetarëve.
Pandemia ishte një kërcënim i tmerrshëm, që tromaksi dhe po tromaks shumë njerëz”, tha Basha në emisionin “Çim Peka Live” në Syri tv.
Ndërsa e cilësoi shtetin si gjysëm kartoni, Basha tha se ne bëmë punën tonë si opozitë, duke propozuar masat mbështetëse, të cilat fatkeqësisht ende nuk janë zbatuar.
“Pamjet që duhet të jepen nga mediat janë ato që nënat klithin për ushqimet e fëmijëve. Një Kryeministër që i tmerroi shqiptarët me arkivolët që tregonte, dhe në anën tjetër vjedh me tenderat sekretë”, tha Basha.
Sipas tij, Rama vijon propogandën edhe pas 6 javësh që nga dita e parë e shfaqjes së pandemisë. Basha tha se po të ishte ai Kryeministër, sot ¾ e ekonomisë shqiptare do të ishin të hapura.
“Duhej të kishim 10 mijë testime në javë, në mënyrë që situata të ishte e kontrollueshme, dhe ekonomia të hapej. Prandaj sot bëjnë tendera sekretë se ishin të papërgatitur. Rama kërkon t´a mbajë vendin në këtë situatë, ndaj ai s´ka plan as për të nxjerrë vendin nga kriza, as për të mbështetur qytetarët”, tha Basha.
