Kreu demokrat, Lulzim Basha, tha mbrëmjen e sotme në emisionin “Çim Peka Live” në Syri TV, se hapi i parë, që përbën edhe kyçin e fitores ndaj pandemisë, është jo vetëm rritja e testimeve, por një tjetër qasje ndaj tyre.
Basha tha se Shqipëria ka nivelin më të ulët të testeve, ndaj dhe sot kemi një situatë të paqartë dhe mungon tërësisht një strategji nga ana e qeverisë.
Basha tha se hapi i dytë është identifikimi i protokollit, që do të thotë që të izolohen ata që janë të infektuar.
Hapi i tretë, sipas Bashës, është përfshirja e ekspertëve që duhet të vlerësojnë nëse duhet të lirohen apo shtrëngohen masat, bazuar në të dhënat që sigurohen nga testimet reale. Sipas tij, njerëzit po mbahen në shtëpi pa asnjë plan.
Në vijim, kreu demokrat tha se duhet një strategji e qartë që përcakton hapjen ose forcimin e masave, bazuar në grupmosha apo zona të caktuara, duke u bazuar jo në humorin e Kryeministrit, por në vlerësimin e grupit të ekspertëve.
Basha tha se më pas duhet një strategji e qartë lidhur me mbështetjen ndaj qytetarëve dhe bizneseve, për të garantuar një hapje graduale të të gjithë bizneseve.
Kreu demokrat tha se sistemi shëndetësor është katandisur më keq se në kohën e komunizmit, përsa i takon centralizimit.
“Në rastin e pandemisë dolën në pah pasojat e atyre 3 apo 4 kontratave korruptive në fushën e shëndetësisë”, tha Basha.
