Banka e Shqipërisë në një raport të saj evidenton se pasojat ekonomike nga kriza e shkaktuar si pasojë e epidemisë së Covid-19 do të kenë një efekt negativ zinxhir nga biznesi, te të punësuarit dhe te sjellja e tyre në treg.
Raporti i Stabilitetit Financiar ka analizuar ndikimin e deritanishëm të emergjencës shëndetësore të COVID-19 në ekonominë tonë.
Sipas raportit, kriza do të godasë ekonominë e familjeve shqiptare, duke ulur konsumin dhe duke shkaktuar vështirësi në shlyerjen e pagesave dhe kredive.
“Kjo situatë do të ndikojë edhe mbi punëmarrësit dhe në tërësi mbi të ardhurat e familjeve, pasi rënia e aktivitetit të ndërmarrjeve mund të sjellë reduktim të të ardhurave apo ndërprerje të pagës.
Në një efekt zinxhir dhe për aq sa nuk kompensohet nga kursimet e familjeve dhe masat shtetërore mbrojtëse, kjo edhe më tej mund të ndikojë në dobësimin e konsumit të tyre dhe në vijim, edhe në vështirësi për të përmbushur detyrimet financiare.
Këto të fundit, mund të përfshijnë edhe vështirësi në shlyerjen e kredive të marra në institucionet financiare, duke sjellë rënie të cilësisë së kredisë në këto institucione dhe ndikim negativ në rezultatin financiar”, theksohet në raportin e Bankës së Shqipërisë.
Ajo ka kërkuar nga Qeveria, por edhe nga sistemi bankar, për të vlerësuar dhe ndërmarrë masat e duhura që do të sjellë kjo situatë.
“Përballja me një situatë të tillë përmban të panjohura, të cilat kanë nevojë të kapen në mënyrë të përshtatshme nga modelet aktuale të vlerësimit të kapaciteteve të sistemit financiar dhe të sektorit bankar”, thuhet në raport.
Sistemi bankar duhet të vlerësojë goditjet eventuale, jo vetëm në afatshkurtër, por edhe në një afat më të gjatë, sugjeron BSH, ndërsa shton se nevojitet që përmirësohet më tej gjendja e rezervave të kapitalit dhe të likuiditeti, për t’i paraprirë çdo lloj situate.
