Autoritetet ligjzbatuese gjermane njoftuan sot arrestimin e pesë anëtarëve të dyshuar të Shtetit Islamik. Ata u arrestuan në landin e Rhein-Westfalisë dhe dyshohet se po planifikonin sulme terroriste kundër forcave amerikane.
“Ata së bashku themeluan një të ashtuquajtur qelizë në Gjermani. Ata fillimisht kishin planifikuar të udhëtonin në Taxhikistan për të marrë pjesë në luftimet kundër qeverisë si pjesë e ‘xhihadit të armatosur’. Pasi të akuzuarit nuk ishin përmbajtur te ky projekt, ata tani synonin të kryenin sulme fatale në Gjermani”, tha Prokuroria në një deklaratë.
Anëtarët e dyshuar të Shtetit Islamik formuan qelizën e tyre terroriste në janar të vitit 2019.
Prokurori tha se anëtarët e Shtetit Islamik ishin në kontakt me udhëheqësit islamikë të nivelit të lartë në Siri dhe Afganistan nga të cilët morën direktiva.
Qeliza e Shtetit Islamik planifikoi të sulmonte forcat amerikane në Gjermani, si dhe individë.
Sipas prokurorit, qeliza e Shtetit Islamik “planifikoi një përpjekje për vrasje ndaj një personi, i cili nga këndvështrimi i të akuzuarit, kishte bërë deklarata publike që ishin kritike për Islamin. Në këtë kontekst, viktima e shënjestruar e vrasjes, tashmë është spiunuar nga i akuzuari Farhodshoh K.
Bazat e Forcave Ajrore të SH.B.A.-së në Gjermani gjithashtu ishin në objektiv, shkruan Jerusalem Post.
Qeliza terroriste “tashmë kishte armë zjarri dhe municion për të realizuar planet e sulmit. Për më tepër, i akuzuari Ravsan B. dha udhëzime për prodhimin e të ashtuquajturave pajisje eksplozive dhe zjarri jokonvencionale (USBV)”, tha prokurori.
Ai shtoi se “për të financuar planet e tyre dhe ‘Shtetit Islamik” në Siri, të akuzuarit mblidhnin para në Gjermani dhe ia transferuan shoqatës përmes agjentëve financiarë të vendosur në Turqi”.
“Për të siguruar shoqatën me fonde shtesë, i akuzuari Ravsan B. pranoi një pagesë me vlerë 40,000 dollarë për një sulm vrasjeje në Shqipëri”, tha Prokurori.
Por, terroristët e dyshuar nuk ishin në gjendje të kryenin vrasjen në Shqipëri.
“Të dyshuarit janë shtetas të Taxhikistanit me emrin Azizjon B, Muhammadali G, Farhodshoh K, Sunatullokh K, dhe Ravsan B.
Gjermania nuk pranon të publikojë emrat e fundit të të dyshuarve për arsye të mbrojtjes së intimitetit.
Ravsan B. u arrestua në Mars, 2019 dhe katër të dyshuarit e tjerë të ISIS u arrestuan të Mërkurën.
