Presidenti Ilir Meta ka thirrur një tjetër mbledhje të Këshillit të Sigurisë Kombëtare ku do të diskutohet mbi situatën e krijuar nga epidemia e Covid-19 dhe masat e marra për përballimin e situatës.
Mbledhja do të zhvillohet pasdite në formatin e mbledhjes së mëparshme.
Mësohet se në takimin e sotëm do të diskutohet mbi masat ekonomike të ndërmarra nga Qeveria për përballimin e situatës.
Burime nga Presidenca konfirmojnë se në këtë takim do të diskutohen dy paketat e propozuara nga Qeveria, përmes të cilave parashikohen dhënia e “pagës së luftës”, sikundër e quan Kryeministri Edi Rama, për qytetarët që kanë humbur një vend pune, të vetëpunësuarit, apo familjet me ndihmë ekonomike.
Në mbledhje pritet të diskutohen skenarët lidhur me përshtatjen e bizneseve, mbështetja ndaj tyre, papunësia, por edhe rimëkëmbja ekonomike pas krizës.
Gjithashtu do të diskutohet mbi çështjet e rendit dhe sigurisë në vend, por edhe operacionet e riatdhesimit të shqiptarëve, që pritet të nisin në fundjavë.
