Detaje të reja dalin në skenë nga skema e mashtrimit të dy personave të arrestuar dje pasi u premtonin aplikantëve për në Akademinë e Policisë se do të ndërhynin me qëllim që të pranoheshin kundrejt 800 eurove.
Gëzim Metalia, 44 vjeç dhe Rexhep Rexha u vunë në pranga nga Shërbimi për Çështjet e Brendshme dhe Ankesat pas një hetimi intensiv dy mujor me metoda speciale të hetimit, me të cilat u arrit të dokumentohej veprimtaria e kundërligjshme e tyre.
Pikërisht nga këto hetime, ku bëjnë pjesë edhe përgjimet është zbuluar një tjetër person i përfshirë që kishte rolin e pedagogut.
Në dosjen e materialeve hetimore është i dokumentuar një komunikim mes 44-vjeçarit Gëzim Metalia dhe një shokut të tij. Metalia e merr në telefon dhe i thotë që të prezantohet si pedagogu që të ndihmonte kandidatin për të marrë provimin. Në një moment të dytë, 44-vjeçari merr në telefon “pedagogun e rremë”, i cili flet me kandidatin për ta bindur dhe i thotë që ‘çdo gjë e ke të mbaruar’.
Metalia dhe Rexha, u zbuluarn pasi kishin mashtruar në këmbim të një shume prej 800 eurosh, një shtetas me inicialet B.L., nën premtimin se do t’i jepnin të gatshme përgjigjet për testimin në Akademinë e Sigurisë dhe do të ndërhynin për pranimin e tij nga ana e komisionit. Sipas policisë, ata kishin organizuar këtë skemë mashtrimi, që synonin ta përdornin edhe ndaj aplikantëve të tjerë në Akademinë e Sigurisë.
Nga kontrolli i banesës dhe ambienteve të tjera, në pronësi të Gëzim Metalias, u gjetën dhe sekuestruan 10 karta SIM si dhe dokumente të ndryshme, të cilat e implikojnë atë në veprimtari të kundërligjshme. Ndaj tyre rëndojnë akuzat për veprën penale “Korrupsion pasiv ndaj personave që ushtrojnë funksione publike” dhe “Mashtrimit” në bashkëpunim.
(Boldnews)
