Një lokal në Elbasan duket se është kthyer në një vatër për infektimin e disa personave me koronavirus, ndërkohë që pronari dhe bashkëshortja e tij, tashmë janë ndër pacientët pozitivë me Covid 19.
Lokali ka funksionuar edhe pas Aktit Normativ që detyronte bizneset, veçanërisht bare dhe restorante, që të ndërprisnin aktvitetin.
Me qepena ulur, duket se pronari i lokalit është kujdesur që të vijojë aktivitetin, ndërsa nuk dihet ende se si ka mundësi që asnjë nga institucionet lokale në Elbasan, përfshi edhe policinë, nuk kanë mundur të zbulojnë një gjë të tillë.
Nga të dhënat e deritanishme rezulton se edhe një qytetar, që ushtronte aktivitetin e kasapit në Elbasan, dhe që ka furnizuar deri para pak ditësh me mish lokalin në fjalë, ka rezultuar pozitiv nga Covid 19. Nuk dihet nëse kasapi ka infektuar pronarin e lokalit, apo anasjelltas, por autoritetet shëndetësore po gjurmojnë kontaktet.
Nga 26 testet e kryera në Elbasan në ato që janë identifikuar si kontakte, vetëm dy kanë rezultuar pozitivë, por gjurmimet vazhdojnë. Personat që i janë nënshtruar testeve janë këshilluar të vetëizolohen dhe të kontaktojnë autoritetet nëse do të shfaqen shenjat e Covid 19.
Dyshimet janë se mes personave që mund të rezultojnë pozitivë janë edhe zyrtarë të institucioneve, që mund të kenë frekuentuar lokalin, gjatë kohës që të gjitha lokalet dhe restorantet kanë qenë zyrtarisht të mbyllura.
Burime shprehen se nga gjurmimi i rasteve të kontaktit janë identifikuar rreth 47 persona, të cilët do t´i nënshtrohen testeve për të parë nëse janë prekur ose jo nga koronavirusi.
