Kryeministri Edi Rama ka reaguar ndaj protestës së ekipit mjekësor të Urgjencës së Lezhës, lidhur me shpërblimin e bluzave të bardha për muajin mars.
Mjekë dhe infermierë të Urgjencës së Lezhës pretendojnë se duhet të merrnin 1 mijë euro shpërblim për muajin mars, ndërsa i janë akorduar vetëm 5 mijë lekë, shumë e cila nuk është pranuar, duke i kërkuar strukturave të Shëndetësisë që ato t’i shkojnë familjeve në nevojë.
Por Rama në reagimin e tij thotë se 1 mijë euro do t’i jepen bluzave të bardha që janë në vijën e zjarrit.
“Unë e kam thënë shqip që do të paguajmë 1000€ mbi pagën për mjekët e infermierët në Vijën e Zjarrit! Kush ka ngatërruar vijën e zjarrit në spitalet Covid e në autoambulanca, me detyrën e bluzës së bardhë në territor, duhet të kthjellohet e të mos turpërojë bluzën e bardhë!”, shkruan Rama.
Në vijim, Kryeministri aludon se protestat janë të nxitura nga jashtë, duke hedhur indirekt akuza në drejtim të opozitës.
“Kush i nxit nga jashtë kërkesat për shpërblime pa asnjë sens bën politikën e mbrapshtë që ka bërë gjithnjë dhe do ndëshkohet nga populli, kush nga brenda bëhet mashë politike cënon misionin e shenjtë e moralin e bluzave të bardha në këtë luftë dhe nuk do të justifikohet në vijim!”, shkruan Rama.
