Coronavirusi tashmë është përhapur në masë duke i bërë eventet publikë apo organizimet sportive të pamundura. Ashtu si çdo sport tjetër, Covid-19 ka prekur edhe MMA-n duke e vendosur eventin e madh të UFC-së të planifikuar të mbahet më 18 prill në rrezik.
Për sa i përket kësaj date, duket se Dana White ka gjetur zgjidhjen, duke respektuar afatin e paracaktuar. Ideja e tij është që UFC-249, të zhvillohet në një ishull privat ndërsa ka marrë përgjegjësinë e plotë për të gjitha masat e sigurisë.
“Jam shumë pranë marrjes me qira të një ishulli privat. Besoj se këtë gjë do ta mbyll për 1 apo 2 ditë dhe më pas këtu do të zhvilloj të gjitha eventet”, ka qenë deklarata surprizë e Dana White, presidentit të UFC-së.
“Po sjellim këtu të gjithë infrastrukturën e nevojshme dhe do të zhvillojmë këtu të gjitha duelet. Jo vetëm me sportistë amerikanë, por nga e gjithë bota. Kisha premtuar se eventi UFC-249 do të organizohet më 18 prill dhe do ta mbaj fjalën, duelet do të zhvillohen”, tha Dana White.
Sfida kryesore e këtij eventi është ajo mes Tony Ferguson dhe Justin Gaethje, e vlefshme për titullin e përkohshëm të peshës së lehtë.
