Nga Boldnews.al
Kryeministri Edi Rama u justifikua pas “mendimit të Komitetit të Ekspertëve” për qasjen e qeverisë së tij për të realizuar një numër të kufizuar testesh për COVID-19, në kundërshtim me rekomandimet e Organizatës Botërore të Shëndetësisë (OBSH), e cila rekomandon “test, test, test”.
Rama, i cili nuk preferon të pranojë asnjë kritikë, gjithësesi nuk ia qartësoi publikut arsyen se përse grupi i ekspertëve, mjekë me përvojë në përballimin e epidemive, sugjerojnë teste vetëm për “të dyshuarit reale” si të prekur nga koronavirusi.
Mjekët, përfshirë edhe ata të përgjithshëm, janë të bindur se testimi në masë është forma më e mirë për të parandaluar dhe zbutur efektet e epidemive virusale.
Gjithësesi, opinioni i tyre profesional zbatohet në bazë të kapaciteteve shtetërore për të kryer analiza masive.
Pikërisht, këtu qëndron “thembra e Akilit”. Kapacitetet e institucioneve shëndetësore shqiptare janë minimale.
Kjo situatë duket e qartë, jo vetëm në cilësinë e pajisjeve mjekësore që janë në dispozicion të mjekëve shqiptarë, por edhe nga fakti që një seri tenderash të drejtëpërdrejtë të realizuar së fundmi, treguan që sektori shëndetësor shqiptar është i keq-pajisur.
Ndërkohë që epidemia COVID-19 po trokiste në dyert e Shqipërisë, kryeministri Rama, ministrja e Shëndetësisë Ogerta Manastirliu dhe një aradhë zyrtarësh qeveritarë, deklaruan publikisht se vendi kishte siguruar masat e nevojshme për të përballuar fluksin e virusit.
Deklaratat e tyre politike u rrëzuan menjëherë, në momentin që në vendin tonë u shfaqën rastet e para me COVID-19.
Autoritetet drejtuese i shpërndanë stafit të Spitalit Infektiv, si edhe shumë kolegëve të tyre të tjerë në qendra shëndetësore, pajisje mbrojtjëse (maska e doreza), të cilat kishin skaduar që në vitin 2011.
Ky veprim ishte shumë i shëmtuar dhe problematik, pasi skadenca e maskave ishte mbuluar me etiketa të tjera.
Kryeministri Edi Rama, ministrja Manastirliu dhe zyrtarët e tjerë u munduan të shpjegonin se, pavarësisht se ishin të skaduara, ato e kryenin më së miri funksionin e tyre mbrojtës.
Një argument shumë i dobët, i pambështetur në asnjë logjikë normale, por që gjithësesi ishte sinjali i parë për të treguar se qeveria shqiptare nuk ishte aspak e aftë për të përballuar pandeminë.
Në vijim, përkundër deklarimeve të autoriteteve qeveritare për marrjen e masave, në spitalet e shndërruara në “COVID”, mungonin aparaturat më elementare.
Në dy tendera të njëpasnjëshëm dhe pa garë, Ministria e Shëndetësisë porositi 54 respiratorë dhe 240 monitorë, me vlerë totale rreth 4.5 milionë euro.
Krahasuar me tenderat multi-milionësh në sektorin e Shëndetësisë, por sidomos me koncensionet qindra-milionësh, shuma për respiratorë e monitorë është e papërfillshme.
Por, duket qartë që qeveria shqiptare nuk i ka pasur prioritet forcimin e kapaciteteve spitalore. “Pjesa e luanit” e buxhetit të Shëndetësisë është shpërndarë nëpër “klientë qeveritarë”, duke dobësuar gjithnjë e më shumë sektorin, gjithësesi të goditur prej kohësh nga mungesa e investimeve.
Mjaftojnë vetëm kaq të dhëna, për të kuptuar plotësisht se Qeveria Shqiptare nuk ka qenë aspak e përgatitur për përballimin e epidemisë. Në këtë mos-përgatitje, natyrisht, përfshihet edhe numri i pakët i testeve.
Në këtë situatë të rëndë për sistemin shëndetësor, “Komiteti i Ekspertëve” nuk mund të bëj më shumë se sa të sugjeroj menaxhimin me efikasitet të testeve në sasi minimale.
Pikërisht, këto mangësi nuk preferon të shpjegojë Edi Rama dhe zgjedh të fshihet pas “opinionit të ekspertëve” kur flet për numër të kufizuar testimesh.
