Lajme të mira vijnë nga Turqia për sa i përket gjendjes shëndetësore të legjendës së kombëtares turke, Rustu Recber. Legjenda e portës turke, u shtrua në spital disa ditë më parë i prekur nga Koronavirusi.
Pas lajmeve disa ditë më parë se gjendja e tij ishte përkeqësuar, tashmë situata për 46 vjeçarin paraqitet e stabilizuar. Sikurse kanë njoftuar shërbimet shëndetësore, që e kanë nën kujdes, Rustu ka nisur të përmirësohet dita-ditës, por sigurisht vazhdon të qëndrojë në izolim dhe nën mbikëqyrjen e rreptë të mjekëve.
Pjesën më të madhe të karrierës së tij , Rustu e kaloi te Fenerbahce ku luajti për 12 sezone duke fituar 4 herë Superligën Turke dhe një herë Kupën Ataturk. Gjithashtu ka luajtur edhe për Besiktas ndërsa edhe këtu u shpall kampion i Superligës Turke në sezonin 2008-2009.
