Operaratori i Shpërndarjes së Energjisë pagoi rreth 1 miliard lekë për automjete me qira dhe 1.2 miliardë për pjesë këmbimi automjetesh.
Nga Boldnews.al
Skandalet e panumërta të Operatorit të Shpërndarjes së Energjisë Elektrike (OSHEE) me shpërdorimin e fondeve publike kanë arritur kulmin. Sëfundmi Boldnews.al publikon tenderin e radhës të këtij institucioni për “Blerjen e pjesëve të këmbimit dhe riparim të automjeteve të OSHEE”, me fond limit 1.2 miliard lekë.
Në pamje të parë ky tender duket si një nevojë e këtij institucioni për të mirambajtur makinat. Por absurdi qëndron pasi Boldnews.al ka raportuar disa javë më parë se OSHEE ka hapur dy tendera për marrjen e makinave me qera.
Tenderat u fituan nga dy koncesionarë, njëra nga “CLASSIC” në pronësi të njërit prej biznesmenëve që mbështet fuqishëm qeverinë e majtë, Agron Papuli dhe tjetra nga koncesionari “Hyundai Auto Albania”.
Për biznesmein e shumëpërfolur Papuli, OSHEE i dha 330 milion lekë ku koncesionari “CLASSIC” do të japë për përdorim makina me qera të modeleve Volkswagen për një periudhë 3 vjeçare. Sipas kontratës me OSHEE, koncesionari përfshin servisin e makinës, pagesën e detyrimeve vjetore si dhe çdo dëm që vjen nga aksidentet rrugore.
Ndërsa me koncesionarin “Huyndai Auto Albania” në pronësi të Ilir Zekës, kontrata është me e majme pasi OSHEE i ka dhënë 596 milion lekë për marrjen e makinave me qera për 3 vjet. Kushtet janë të njëjtat, ku koncesionari përfshin çdo problem dhe taksa të makinës.
Por edhe pse me një kosto tepër të lartë për marrjen e makinave me qera, administratori i OSHEE Ardian Çela vendos që të blejë edhe pjesë këmbimi për mirëmbajtjen e këtyre makinave. Boldenws.al mëson nga burime brenda OSHEE, se drejtoria qëndrore e këtij institucioni ka vetëm 3 makina të përdorura pasi për pjesën tjetër përdoren makina me qira.
E thënë ndryshe, ky tender nuk ka sesi t’i shërbejë OSHEE por nga ana tjetër mund të mbush xhepat e ndonjë tjetër klienti të qeverisë.
Tenderi prej 1.2 miliard lekësh i cili do të hapet në datë 19 shtator do të shpallë fitues një tjetër klient të qeverisë. Brenda muajit shtator do të mësohet se kush do të marrë këtë megatender për pjesë këmbimi makinash që nuk dihet se për kë do të shërbejnë.