“Rrini në shtëpi, bëjuni të padukshëm ndaj koronavirusit”, janë këshillat që mjekët dhe epidemiologët japim prej disa javësh, ndërsa Bota është përfshirë nga pandemia e Covid-19.
E ndërsa virusi që lindi në Wuhan në Kinës u përhap me shpejtësi në mbi 100 vende, duke shkaktuar qindra mijëra të infektuar dhe një numër mbi 20 mijë vdekjesh, masat e vetme të rekomanduara janë ruajtja e higjenës personale dhe qëndrimi në shtëpi, pra ekspozimi sa më pak, duke krijuar kështu një distancim social, që nuk lejon përhapjen e koronavirusit.
Thirrjes së mjekëve de autoriteteve i është bashkuar edhe grupimi i tifozave Kuqezi.
Ato kanë zgjedhur në mënyrën më origjinale, që t´i drejtohen qytetarëve që të qëndrojnë në shtëpi.
Nga thirrjet e njohura “kush s’kërcen nuk është shqiptar, o hej”, grupimi i tifozëve përdor thirrjen “kush s’rri në shpi, nuk është shqiptar, o hej”.
“Të dashur tifoza, Tifozat Kuq e Zi do të nisin publikimin e disa prej thirrjeve tona në stadium, duke i modifikuar ato me situatën aktuale me virusin COVID19. Le të shërbejnë këto thirrje edhe si sensibilizim shtesë i të gjithë neve duke qëndruar në shtëpitë tona, dhe respektuar thirrjet e autoriteteve. Bonu shqiptar i mirë #rrinshpi”, thuhet në një nga mesazhet në seri që po shpërndajnë Tifozat Kuqezi.
