Ish-kryeministri Sali Berisha ka shkëmbyer një replikë në distancë me ambasadorin amerikan Donald Lu ku iu referua deklaratave të këtij të fundit për “Al Kaponen”.
Berisha tha se në Amerikën e viteve ‘20 kohë kur Al Kapone u bë i famshëm, presidenti i SHBA-ve nuk kishte asnjë lidhje me këtë mafioz, ndërsa në Shqipëri sipas tij, Al Kapone është kryeministër.
“Dje ambasadori amerikan foli për Al Kaponen dhe Amerikën e viteve ‘20. Por ndryshimi është i madh. Presidenti i viteve ‘20 nuk kishte asnjë lidhje me Al Kaponen. Kurse këtu Al Kapone është ushtar i super Al Kapones, Edi Ramës. Këtu Al Kapone është kryeministër. Përdor fuqinë e ekzekutivit për të fuqizuar krimin”, tha Berisha.
Ambasadori amerikan tha dje se politikanët e lidhur me krimin duhet të përfundojnë në burg duke theksuar se duhet të marrë fund koha e “Al Kapone-ve”. Ai u shpreh se situata në Shqipëri është serioze, por shtoi se reforma do rregullojë problemin e mosndëshkueshmërisë dhe lidhjet e krimit me politikën.
